Karrajua.kom Komunitatea eta taldeak

Irrintzi 400, Iruñeko euskaltegi baten bloga eta kanpaina - Iruñeko Donibane auzoko Irrintzi AEK euskaltegiak egoitza berria irekiko du 2007ko ekainean. Egun, 220 bat ikasle dituzte eta egoitza txiki gelditu zaie. Euskaltegiak irekiko duen egoitza berriarekin 400 ikasletara heldu nahi dute AEK-ko irakasleek. Horretarako, abian jarri dute Irrintzi 400 egitasmoa. Bestetik, aurten AEK elkarteak Korrikatik lortuko duen dirua Irrintzi euskaltegiaren egoitza berrirako eta Baionan beste euskaltegi bat zabaltzeko erabiliko dute. Eta gauza bat eta bestea jarraitzeko, Irrintzi 400 bloga ireki dute. [Sustatu]

Sustatutik zabaldu dute berria, eta agregatzailean sartu badugu ere, orain arte honen aipamenik ez dugula egin konturatu gara. Euskaltegi berria blogaren abiadan joaten bada, ederto baten.

• Irrintzi400

-->

Gauza bat eta bestearekin Karrajuari ez diot kasu handirik egin azken astean. Blogosferan aurkitu ditudan hiru ale ekarriko ditut tamagotxia aspertu ez dadin:

• Euskara ikasten dabilen batek bloga egin du euskara idatziz praktikatzeko. Euskarazoak dauka izena, izan ere, euskara eta arazoak ditu idazgai (euskarekiko arazoak suposatzen dut). Irakurtzen hasita ez dirudi hainbeste arazorik daukanik. Animo laguna!
• Gaztelaniaren irakaskuntzaren inguruko blogosfera beti interesgarrian Expresiones españolas para Erasmus en apuros izeneko bloga topatu dut gaur. Izenak dioen modura, gaztelania ikasleei hainbat esakuneren esanahia eta erabilera argitzen lagundu nahi du. Post bakoitza esakune bat da, eta graziarekin azaltzen du. Euskarazko esakuneak azaltzeko inor animatuko da horrelako bat egiten?
• Esakuneak ez dakit, baina Euskal Herrian, Bilbo inguruan zehazki, dabiltzan kanpotarrentzat euskara ikastaroak antolatu dituzte ingelesez eta frantsesez. Mediaberri blogean jaso dugu GITE/IPES eta Palanka euskara taldeak antolatu duten ikastaro hauen berri. Iaz EHUk Erasmus programako ikasleentzat euskara ikastaro bereziak antolatu zituen hiru campusetan, gaztelaniatik abiatuta baina.

-->

Helduen euskalduntzetik nola enfokatu hizkuntzaren normalizazioa:

AEK: EBI (1985)

• EBI: Ekintza Bidezko Ikaskuntza / Kulturgintza Bidezko Ikaskuntza 
• Oinarrizko kontzeptuak: eragina, kulturgintza, herri-irakaskuntza.
• Iturriak: Paulo Freire, Alemaniako mogimendu ekologista, Andaluzia eta Catalunyako esperientziak,...

Normalizazioari begirako ikuspegia

• Kultura: norbera eta komunitatearen eraikitze prozesua bezala ulertuta.
• Euskara ikaslea kultura horren sortzaile gisa ulertzen da. Ikas-taldeak ingurura begira jardun behar du.
  
• Komunikazio eginkizuna komunitatean eragiteko eginkizun bihurtu. Inguruan eragin: euskararen statusean eta erabileran batetik, eta jendartean bertan bestetik.

Jardunbide didaktikoa

• Programa mota: nozio-funtzionala, proiektugintza, gaikakoa-situazionala.
  
• Programaren antolaketa: 6 urrats 24 ziklo, 25 ordu ziklo bakoitzak.
• Edukien banaketa: funtzioak, esakuneak, nozioak (orokorrak eta espezifikoak), edukiak (linguistikoak)
  
• Ikuspegi metodologikoa: komunikatiboa, APP(?), edukien lanketa ludikoa, praktikaren garrantzia.
  

Ondorioak eta emaitzak

• Lehenengo hausnarketa garatua helduen euskalduntzea eta normalazioa uztartzeko.
• Esperientzia ugari lehenengo urteetan.
• Gaur egun nahikoa sakabanatuta dago: ahalegin batzuk egiten dira, baina orduko sistematizazioa galdu egin da.
  

Bibliografia:

• ELE 1 (1987): planteamenduaren aurkezpena. Aurrekariak, kulturgintzaren kontzeptua, lehenengo esperientziak, programazio ereduak,..
  
• ELE 2 (1987)
• ELE 6 (1990~) Giza talde naturalen markoa, Pello Jauregi.
  
• ELE 10 (1992): ikuskera berria, ingurune hurbila. Nafarroako esperientzia
  

 

Sarean han eta hemen zabaltzen diren aipamenen artean gaur William Glasser psikiatrarena ei den batekin egin dut topo. Askok honez gero ezaguna daukazue seguruenik. Hona hemen:

Ikasten dugu:

• Irakurtzen dugunetik %10.
• Entzuten dugunetik %20
• Ikusten dugunetik %30
• Ikusi eta entzuten dugunetik %50
• Besteekin berba egiten dugunetik %70
• Norberak esperimentatzen duenetik %80
• Besteei irakasten diegunetik %90.

Ergo?

edo

Horrela da?

-->

Egunero izaten da zerbaiten nazioarteko eguna, baina neuk behintzat gaur arte ez dut otsailaren 21ean ospatzen den honen berri eduki: Ama-hizkuntzaren nazioarteko eguna.

Aniztasun linguistiko eta kulturala sustatu eta gordetzearren ezarri zuen UNESCOk egun hau. Ospakizunak ere badira han eta hemen. Baina UNESCOk ama-hizkuntzaren kontzeptuari ematen dion definizioari erreparatu diot gehien bat.

Haren arabera ama-hizkuntza hauetako bat da:

• Lehenengo ikasi dugun hizkuntza edo hizkuntzak
• Idenfikatzen garen hizkuntza edo besteek idenfikatzen gaituzten hizkuntza.
• Hobetoen egin eta gehien erabiltzen dugun hizkuntza(k)
• Lehenengo hizkuntza.

Gurera ekarrita, uste dut euskaldun zahar/euskaldun berri bereizketa horretatik harago doala UNESCOren definizio hau. Eta bigarren puntua erraz lotu daiteke atzo aipatu genuen Joxe Manuel Odriozolaren artikuluarekin.

-->

Hizkuntzak berezkoa du identitatea - Joxe Manuel Odriozolaren artikulua argitaratu du Izaronews egunkari digitalak. "Euskalduntzearen eta alfabetatzearen emaitzak ikusita, inork gutxik ukatzen du gaur egun gure porrotaren handia. Inork gutxik aitor ditzake irakaskuntza formalean eta informalean lortu ditugun emaitzak ikusita, euskararen ikasketak euskaldunak sortzeko balio izan duenik. Aho batez ez baldin bada ere, ñabardurak... [Tiraka]

Hizkuntza eta identitatearen arteko loturaz dihardu Joxe Manuel Odriozolak artikulu horretan. Hausnartzeko kontu asko euskalduntzeari dagokionez. Edozelan ere, lehenengo baieztapen hori izan da niretzat deigarriena. Hainbesterakoa da gure porrota? Nortasun arazoa ote da?

Neuri behintzat identitatearen kontu hori gutxien-gutxienez apur bat labaina egiten zait.

 

-->

Azken Hizpide heldu zait duela astebete. Oraindik ez dut irakurri, gainetik kukutxu bat egin. 4 artikulu dakartza:

• Aitor Etxebarriak Hiznet-erako egin zuen ikerketa ikasle helduen motibazioaren inguruan. Udal-langileen taldea aztertu zuela dirudi. Luzetxua baina interesantea dirudi. Administrazioko ikasleekin (HAEE, IRALE, Osakidetza, Udalak…) gure lana hobeto antolatzen lagungarria izan daiteke.
• Aukera anitzeko galderetan zoriak zer pisu duen aztertzen saiatu da Josu Perales beste baten. Josu Hizpideko fijoetako bat da, eta haren artikuluetan azterketa serioak topaten dira. Aintzat hartzekoak.
• Aurrekoan blog-en ingurukoa atera zuten eta orain berriro internetekin datoz Natxo Guillen eta Agurne Azpitarte HABEko teknikariak. Webquest-ak eta Altxorraren bila prozeduren inguruan. Nik ez ditut asko ezagutzen , ea ideiaren bat ematen diguten.
• Azkenengoa Santurtziko duodinamikoaren eskutik dator (porsierto, zer pasatu da irakasleon aldizkariarekin?). Abel Camacho eta Pedro Lonbide. Aspaldion dabiltza Europako Markoari bueltak ematen. Ea oraingoan zer dakarten. Adi egotekoak izaten dira hauenak, eurak ere bai. Europako markoa hor daukagu eta eskerrak baten batek lantzean behin akordarazten digula.

Esan dudanez, ez dut oraindino irakurri, datorren asteburuak aukera emango digula dirudi (euskalmet-i kasu eginez gero behintzat). Datorren astean irakurri ditudanen gaineko inpresioak ekartzen saiatuko naiz.
Dana dala HIZPIDEren gainean burutaziotxu bi amaitu aurretik. Ez daukazue sentsazioa apur bat ezezaguna dela. Euskaltegietara banatu bai, baina apaletan geratzen da. Irakurtzen da? Ezezkoan zergatik ote? Interes falta, formatoa, …? Gure munduan ibili zen batek behin bota zuen karrajualdi baten gure sektorean ez dela bape irakurtzen. Egia ote?

Zerrenda